بما انو شي ما تغير في حال مدام فيتو(fait-tout )نعاود ننشر الي قلتو العام الفارط

-------------------------------

مدام فيتو (fait-tout ) مرى تونسية تحتفل يوم غرة ماي بعيد الشغل وفي هالنهار تلعن فيه النهار الاول الي خرجت فيه للخدمة هي في الحقيقة موش ضد لمرى الي تخدم اما ضد التوقيت الاداري لحموم الي نجح باش يجعل منها مكينة اصحيح هي تصبر روحها  وقتلي تسمعهم يحكو عليها الي هي جزء مهم في الاقتصاد الأسري، والوطني وجرد الشهرية تمنحها استقلالتها وتخليها تحس وووووووووووووواما يهبلوها كيف يقولو عليها مدرسة (مدرسة مسكرة عندها سنين)  وهات ماك الكلام لحلو اما الواقع يقول الي المكينة بدات تتفريك بالله مرى مالصباح للليل في الشارع وكيف تروح يلزمها تكون ام وزوجة وربة بيت و استاذة وساعات فرملية

في الحقيقة مدام فيتو قاتلة روحها باش توفق بين شغلها وعائلتها اما الكلو على حساب صحتها هو كل يوم كيف خوه حتى ساعات راديو الكرهبة كيف يعدو حظك اليوم تضحك عليهم وتقوللهم اياماتها ولات كيف بعضها

قالت نهار هات انكلم جمعية نسائية )جمعية امهات تونس) ثماش ما ياخذو قضية التوقيت الاداري لحموم جاوبتها "مرى" (واشكون ما يعرفش صوت السيدة العقربي) وقاتلها ماو ثبتوا ارواحكم  تحبو تخدمووالا لا وزيد نحنا لاهين نطهرو في الذكورة في المناطق المعوزة ولاهيين بالتنظيم العائلي" قالتلها مدام فيتو أي انا قتلك انحب انظم عايلتي وانروح بكري جاوبتها " لا يامرى التنظيم العايلي نقصد بيه الحاجة لخرى "  علقت مدام فيتو التلفون وهي ضاربتها البهتة وقالت أي انحب نخدم اشبيها لمرى في البلدان المتقدمة ماي تخدم اما توقيت واحد برى   

جا لبال مدام فيتو الاتحاد العام التونسي للشغل قالت حتى انا زادة شوف في اشكون انخمم باش يحل مشكلة التوقيت الاداري لحموم في قيادة الشغالين المشغلولين بين التمديد او التجديد ومرمة حي الخضراء بنية اللهم صلي على النبي غنات عليها ام كلثوم غناية الاطلال قبل ما تشوفها (كان صرحا فهوى) ومن ناحية اخرى الكلهم رجال ما اعطاوش لمرى حقها معاهم ولو في نقابة اساسية خلي باش يشوفولها حل في التوقيت الاداري لحموم

حطت مدام فيتو يدها على خدها وظهرت قدامها لقروضات الي الي كبلوها وخلاوها تايس من التقاعد المبكر والاولاد الي قد ما يكبرو يكبر معاهم ثمن الدروس الخصوصية و ووووحست روحها باش ادوخ مشات تجري غسلت وجها حتى ادوخان معندهاش الحق فيه يلزمها فايقة 24 ساعة على24

وكل عام والبنكاجية بخير

ا