حالة العجز في "بلاد العجايب" متواصلة ولا حياة لمن تنادي

يبدى يا سي ..عندي مديدة وأنا نعوم ونغطس في الانترنات لاحظت الي كلمة العجز كثر استعمالها في "بلاد العجايب" ...بعد أربعة وخمسين عام إستقلال ..يضهرلي بلادنا بدات تدخل في مرحلة اليأس و يلزمها هرمونات في القريب العاجل .....

  قلّك ثمة عجز في الخصوبة الانسانية التونسية....ناقصين برشة في جيبان الصغار ..هالعجز الجنسي واضحة أمورو.....السبب ما يكون كان التوقيت الاداري لحموم .و.stress..والجري ولهيط مالصباح لليل .....ومرض «الكلاميديا» اللي جاي من تسييب اللعب في العلاقات الجنسية...والمواد الكمياوية من الكراهب الادارية الي محروقاتها بلّوشيّـة.....وغيرو من الأسباب ..

 عنا زادة  عجز الميزان التجاري التونسي 5 بلايين دولار عام 2009

وعجز في ميزانية الصناديق الاجتماعية.. ونحنا كل عام يتعدى انقولو برى الجاي ممكن خير....يقومو يخبرونا الي العجز في صنادق الغلبة وصل بـ52 مليارا..وممكن ياسر عام 2014 تصبح عاجزة  باش تعطي حق المنخرطين......الساعة الناس الكل وخاصة مهدودي الدخل معملين عليهم وقتلّي يتهَدْ حالهم ...موش غلبة كبيرة بالله ..خاصة إذا الواحد يسمع بالصناديق "المافياوية" تصول وادجول في الأسواق المالية..

والي قرى قرى ...والي خذى المترو..والمترو والكار..والي خذى اللواج باش يلقى روحو عاجز.....عاجز باش يكون ولو موظف عند أندادو أصحاب الشركات الي يشوفو فيهم في غلافات المجلات ويحكو عليهم وعلى أعمارهم وعلى جوّهم من غير ما يعملو حتى إعتبار لأحاسيس الناس.

وعجزت وزارة التربية  باش تلقى الحلول لتحسين مستوى التعليم وانشاء الله ما يهزوهوش للقعم بكثرة التجارب عليه.

وصل اللعب بعشانا..إيــــنعم ..مكتوب المواطن العادي مازال يتفس شوية ..قلك يلزم يضربوه هو زادة بفيروس العجز ...يحبو الواحد يولي عاجز باش يدخل يدو لمكتوبو ..إينعم بعدِلّي إذا غطس في البحر في الصيف ما يطلع إلا ولقى ألف زيادة في مواد الاستهلاك ...وإذا رقد نهار الأحد يصبح انهار الاثنين فمو طاقة بالزيادات الي صارت وسيادتو راقد على وذنيه.

...قلك زيادة طفيفة في المحروقات ..ما نيش فاهمة كيفاش طفيفة ..هو في الحقيقة ثمة تغيير طفيف في اللغة في العادة يقول تعديل في الأسعار .....
تو بالله ليترى بتاع ليسونس ولات 1.320 مي وهوما يقولو زيادة طفيفة ياخي في بالهم باكو حليب باش الواحد يزيدو الماء ويقسمو على جمعة ....زيد المواطن ماهواش بهلول يعرف إذا زادت هالمحروقات أعرف راي كبدتو باش تتحرق وهو يسمع بالكار زادت والتاكسي زادت.. والخضرة باش بش ينقلوها ماو بالمحروقات ولذا باش تغلى وهي بطبيعتها مشاركة في البورصة نهار تاخو البصل ب450 مي ونهار تاخذو بدينارما نحكوش على شركة الضو اللي لحكومة مطفية عليها الضو وهي عاملة شاطح باطح في المواطن التعيس وفاتورة الماء ماي باش ادزيد ياخي باش يطهرونا ماو بالمحروقات.... الحاصل كل ماهو يتنقل بالمحروقات باش يحرق كل ماهو موجود في مكتوب المواطن المهدود  ..وبالتالي هالمكتوب لحزين باش يضربو فيروس العجز..

نتسائل وينهم نوابنا في البرلمان وغيرهم مالمسؤولين خاصة الي "المحروقات" عندهم بلّوشي وكراهبهم شيفونة بتاع ايسونس.

أعلاه ما يشوفوش حل لهالعجز في الميزانية من غير ما يمسو المواطن التعيس ...مثلا باسم الوطنية يتبرعو أصحاب المليارات الي نسمعو بيهم قاعدين يحضرولنا في تونسهم الغد.

ما بقى كان باش نصيحو بالصوت العالي ةانقولو

سئمنا الحياة وما في الحياة    وما أن تجاوزنا الأربعينات
فما العيش في بلـد بأسها     شديد، وصدّاحا لا يجاب (*)


* بعض التحويرات لقصيدة أبو القاسم الشابي "سئمت الحياة "

****************************

les articles ci-dessous montrent bel et bien que l’inégalité des chances aboutit aux inégalités que nous connaissons. Mais bien sur, il est toujours plus facile d’embellir les apparences que de vouloir régler le problème à la racine

************** 

13/01/2010 08:46:24 | Jeune Afrique

Sakher el-Materi  a 30 ans

http://www.jeuneafrique.com/Article/ARTJAJA2557p044-045.xml5/zitouna-sakher-el-materi-princesse-el-materi-holdingsakher-el-materi.html

Mourad M’hiri, fils de Néji Mhiri dirige l’Hyper U, quatrième groupe de grande distribution en France,

http://www.africanmanager.com/articles/126288.html