تونس /البعرة تدل على البعير

إعيشكم من هنا لقدام معادش حتى واحد يتمنيك بكلمة "زبلة" ...إعيشكم راو قدرها عالي في بلادنا ولي ما عندو شاهد كذاب

 ما و فمة نظرية تحت الدراسة ألا وهي " الزبلة مقياس سياسي واقتصادي  واجتماعي " وبما أنو التونسي للتونسي رحمة قرروا التوانسة باش يساعدوا هالخبراء الدارسين لهالدراسة وكدسولهم الفضلات بجميع أنواعها في شتى الأماكن باش يسهلولهم البحوث الجارية على طول النهار وطول الليل.

 الفضلات تساهم في الاصلاح الاقتصادي

 شركات رسكلة الفضلات  لوكان موش زبلتنا ما تكون....راي تخلص في الاداءات ..وتدفع لصناديق الضمان الاجتماعي ....وووووو...وتساهم في تشغيل الشباب ...صحيح فمة شوية استغلال  للخدامة  كيمة في العالم الكل ..أما فمة تشغيل للشباب...

ومن غير ما انطول عليكم الأمثلة متعددة ......المهم بفضل فضلاتنا اكيد قاعد يدور الدولاب ويدورمعاه اقتصاد البلاد ...والتوانسة بما انهم يفهموها وهي طايرة قرروا باش يساهموا في تدوير هالدولاب برمي فضلاتهم في اماكن شتى وطرق شتى

هاللاجبال من الفضلات تدل على وقوف التونسي جنبا لجنب لخوه التونسي وانو حارص حرص كبير في تكثيف اليد العاملة بشركات رسكلة الفضلات.

الفضلات مقياس لثقافة المواطنة :

كيما تلاحظوفي الشوارع التونسية وخاصة شواع العاصمة ...الي يشري كارطة تليفون يلوح الشقف وباقي يمشي الي يتكيفو ما نحكوش على كرههم للنظافة  ...والي خلطو متاخر لصلاة الجمعة وصلى على كرضونة يخليها ويمشي ..والي مستنزل يلوح لمحرمة وباقي يمشي ...والي يقشر في القلوب ويقلك لقشور ما تضرش البيئة وباقي يمشي...وووووووالله العظيم بام عيني ريت رجال يتبولوا في الطريق ومن غير سترة يعني لكلاب والقطاطس خير منهم ....

 نستنتجو من كل هالتصرفات لغريبة ان التونسي وبعد خمسين عام استقلال ناقص وعي بيئي... فاقد للثقافة الصحية ولثقافة المواطنة  بالتالي ماشي ويفقد انسانيتومع العلم ان بطبيعتو ماشي للاندثار على خاطرالتلوث البيئي في هالبلاد عندو اثر كبير على العقم 

  الزبلة مقياس سياسي _ هذي باش انخليها للخبراء فقط أتساءل هل رئيس البلدية والي فوقو مافيبالهمش بهالحالة لحليلة واخطارها العظيمة راو كان ما يلقاوش حل رانا ماشيين طوالي للوباء عفانا وعفاكم الله

الى من يريد المساهمة في الحملة التحسيسية " حتى تسترجع العاصمة "تونس" جمالها ونظافتها "

 https://www.facebook.com/event.php?eid=141659795859708&v=wall&story_fbid=141663265859361

HONTE