TUNIS LE 05/11/2008 19:06
عندي زملاء انشوف في عجب العجاب منهم هوما في الحقيقة échantillon من الشعب التونسي يلزمهم في القريب العاجل حل ....اهوكة على ماهم مغرومين بالكورة حتى الاحداث العالمية عندهم ماتش كورة.
يبدى ياسيدي في احداث 11 سبتمبر تدخل علي زميلة تتهز وتتنفض من الفرحة قلت لازم فمة تغيير كبير مفاجىء في حياتها خبروها بيه اذا بيها تصيح " ما و ضربو امريكا في الصميم ......." زيد قامت الدنيا في البيرو اللي بجني ..وطلعوا الطرحة الكل يحكو في نفس لحكاية وفرحنين فرحة مافماش وكان موش عاملين شوي حساب للبانكة راهم زغرطو........
واحداث حرب العراق يصبحو الصباح تقول بايتين يتفرجو في ماتش كورة زوز امريكان وعشرة عراقيين ......امريكي وخمسة وعشرين عراقي .......المهم قتلو امريكي ......يا ولادي راهم وليدات خارجين من المدرسة .....اي ميسالش مالا باش حرب .......
واذا يخبرو واحد ولا وحدة منهم الي ولدهم طلعتلو السخانة في الروضة يخرجو ساقيهم اعلى من ريوسهم.
تو عندي مدة وانا انشوف فيهم اتبعو في الانتخابات الامريكانية وكان تسال واحد فيهم على الانتخابات البلدية الاخيرة الي شارك فيها تو اقلك عمرو ما شارك ولا يعرفها منين هبت ونين دبت خلي كان تحكي معاه في انتخابات اخرى تو ما ترى كان العجاج وراه وكان لزم يقاطعك ولى يصب بيك صبة مافماش – المهم اليوم زنس فرحة عارمة ...شاملة ...ضرتبهم …..مالصباح صبحو اهنو في بعضهم بطلوع اباما الي هو ولى رئيس امريكا الي يبخرو بريحتها .. …...تو عاد تفهموش حاجة –
في بالهم يبدى نباحو من صباحو لا ياسيدي راو يبدى نهار 20 جانفي الجاي والراجل قادم على الف كريز وكريزمالمالية لمعقدة للمناخية لغيرها ….. الكورة الارضية كلها ترعش وهو مطالب باش يركحها وزيد عندو وقت محدد باش يعمل برشة حاجات لشعبو والا يجيبوه على برى … امالا مسيبى الامورسيدي .ولذا يزو مالتهنيد انظرو لطموحات اوباما ولنجاحو واحكو لصغاركم عليه كيفاش بدى وانشاء الله يكونو عنا برشة ابامات في هالبلاد .
وكيما قال الشاعر وما نيل المطالب بالتمني ولكن تؤخذ الدنيا غلابا.