اشتدي يا ازمة ...ستنفجري

le fameux compte 26/26 fut une arnaque de grande envergure digne des mafiosi de la camorra.

اليوم ونا في البيورو جاتني وريقة يقولولي فيها تحبش تتبرع بنهار كونجي لصندوق  قالو عليه "يعمل في الخير" اسمو 26-26 ...تو زعمة الواحد اش يقول بينو بين نفسو....يا اما عريان يسلب في ميت... والا الواحد يترهدنو عليه عيني عينك.....ولا حتى راحتو باش يتبرع بيها ..هو شهر مقسمو لعطل الاولاد الي تفوت 120يوم ...ولقضياتو بما انو محصور نهار كامل ..وزيد الصندوق ياخو نهير ولا زوز....

تو الناس الكل تقاسي في غلاء المعيشة ...وتستنى في زيادة الغلبة.....وفمة اشكون طالع بقفة وهابط بقفة للعروفات ثماش ما يتحصل على ترقية حتى لو كان على احساب زملائو....ولاخر يقلقك اعطيني انذوق معاك من الصحن الفارغ...

وحسب كلام سيدنا وزيرالدزة "المالية"  قلك ما نجموش انقصو من سوم ليسونس كيف اكون دورو...على خاطر نتسبو في خسارة بالمليارات لميزانية الدولة ......اما  احتمال كبير باش يعدلو في سوم لحليب ...اهوكة كيف تتهرد علينا اقولولنا باش انعدلو الاسعار....وكيف نطلبو التخفيض باش نعدلو ميزانية مكاتبنا اقولونا باش نتسببوا في خسارة لميزانية الدولة..

شي ادوخ ..نوروني بالله ياخي في لاروس امتاعهم ما فماش كلمة تخفيض في الاسعار.

انا يظهرلي الحسبة محسوبة مع بنك الدم ...اعلاش ما تقولش ايغلو في الحليب اهوكة الواحد باش يشربو اولي يمشي يتبرع بالدم هكاكة يضربو عصفورين بحجرة ..خاصة دم التونسي ما فماش ما اغلى منو....

مختصرا لهدرة  هالوريقة الي قاعدة الدورموش وقت تدوريها راهي اتدور لخواطر.....