أم المهازل -1

انعقدت البارح الثلاثاء الجلسة العامة لنقابة البانكة،  وباش نعطيكم صورة عامة على الحاضرين في القاعة كالعادة الكاتب العام للنقابة الاساسية  ورئيس المؤتمر وضيوفهم الكل رجال comme toujours  اهوكة قبل بنهار جاو "الخطاب على الباب" وبداو يدورو من بيرو لبيروالمترشحين مجموعتين مقسومين في وزو  وكل مجموعة تضم سبعة رجال.في قصباية .

نرجع للجلسة المد خلين العبدولله والبقية رجال ممكن تحط شطرهم بين ظفرين ,

  اوينو العنصر النسائي في بانكة عمرها خمسين سنة  يعني فاتت سن النبوة مع العلم اللي قالولي اللي في السبعينات والثمانينات كانت تنشط في النقابة مرأة ولا الف راجل وبعدها بشوية جات وحدة اخرى معقدتش برشة ..وبعدها ريحة الانثى ما عادش الدور...

اسئلة تطرح انشاء الله نلقالها الجواب ...اعلاه في هالبلاد نحكو ياسر على المساواة بين الجنسين وفي الرسمي تحل الصرة حتى الخيط ما تلقاهش ........انحل قوس تو عندي مدة وانا انتبع في نشاط السيدة مي الجربي تقول أنت ملي دخلت في اضراب الجوع ...قلت ايه هاي النساء واللا لوح ...اذا بيها كيف جات الانتخابات الرئاسية وخرت وقدمت السيد الي يموت على دقلة النور ...اعلاه بالله نعرفوك موش باش توصللها اما علاه تنحي من من مخ نساء هالبلاد "وراء كل رجل عظيم امرأة " راهي ولات بجانب كل رجل عظيم امرأة أعظم , وهذي مناسبة باش نسال فينهم النساء في الاحزاب والجمعيات اللي تدعي الديموقراطية والثورجية وكان لقيت فيها مرأة راهي اما اخت الامين العام واللا زوجتو والا   ,,,, خلوني ساكتة ,–

نرجع لبعض نساء البانكة ما نيش فاهمة علاش ديما موخرين التالي ويحبو ياكلو القسطل بيد القطوسة ,كيف تسمع مواقفهم في الكلورات تقول غدوة نفتح بيهم الاندلس لكن وقت الرسمي

كل وحدة تتطلعلك بطلعة ما يقبلهاش عقل  ونتسائل هل نستحقو مجلة الاحوال الشخصية والا وضعيتنا تستاهل حركة طالبان باش تسيرها ,

نرجع للجلسة العامة لرجال البانكة بدى سي عبد الفتاح يصرصت علينا في مزايا نقابتنا العزيزة منهم "اوهكة وليتو تخرجو مالباب لكبير موش ملباب الصغير" و "اعضاء المكتب النقابي ولى عندهم بيرو يجتمعو فيه"

شوف انت الواحد يسهر على لنترنات "الي تشجع عليها الدولة حتى في الارياف" فقط باش يعرف الفرق بينا وبين الناس الي بعاد علينا بقرون في جميع المستويات ..تو النقابات عندهم توحدو وخرجو للشوارع بنساهم برجالهم ومقيمين الدنيا على هالازمة الي جات على ريوسنا ونحنا مازلنا ناضلوا على خروجنا من الباب  لكبير والا الصغير والغريب انو صفقولو على هالنقطة التي تركب نقطة و اللي هي في حد ذاتها اهانة لأدمية البنكاجي - وخاصة القرياج الي ورى باب لخروج-

مانزيدش نطول عليكم  وأعتذر للزملاء لعدم تمكني من مواصلة الجلسة العامة  لاسباب صحية ,

  ***************

ملاحظة   النقابة لغة هي مؤنث اما الميزوجين فهم الرجال الذين يمقتون النساء