تونس / أصبحنا نأكل قمحنا حشيشا ولا يزالوا يقولون العام عام صابة

22/01/2010 16:08
يا سادة يا مادة  بشوية بلادة ادور هالمدونة وتقيم الراقدين على الوسادة... نطرح اليوم حكاية الانتخابات اللي فاحت ريحتها منذ أيامات وانشاء الله طنجرتها الي تغلي في الفارغ ما تتحرقش انهار الاحد.

يبدى يا سيدي مازالو سويعات على الفينال متاع الانتخابات الرئاسية والتشريعية الي جاتنا مع الفياضانات ومع الكريزات ومع التراجع في الخيرات والتزايد في المصايب والتأخر في التقدم والتقدم في التأخر، ولذا الأمور يقول القايل باش تكون برشة صعيبة على الي باش يشدو الكراسي.

على ما سخفوني هالجماعة المترشحين للكراسي الي على نوعين "الرئاسية والتشريعية" ...بت انخمم نلقالهمشي حل، كان من الانتخابات الرئاسية قلت أعلاه ما نغيروش الطريقة ياسيدي نطلعو بطلعة ما طلع بيها حد قبلنا هكاكة نتأرخوا.

أعلاه ما نشروش رئيس، أي، معناها الرئيس في كل بلاد يولي يتشرى كيما الكوارجي والا المدربين، أحنا نخرجو في العملة الصعبة لهاذوكم وللمغنيين منهونوش على ارواحنا رئيس ... نعملو ابال دوفر    (appel d’offres)ونختاروا رئيس مضروب بالسافوت  كان مشانا لبلاد على الصحيح انزيدوه في فترة  الكنوتراتو.. وكان هكاكة وبرى انغيروه.

كان من الجماعة لخرين جماعة البرلمان فمة حل لقيتو لموضوع الصنادق الي فرغت لحقيقة  اعلاه  ما يتفاهموش جماعة البرلمان ودقو البيبان بالفم المليان في آخر كل عام على أصحاب المليارات  

نواصلوا في الانتخابات البرلمانية  الي كلات على قلب المواطن العادي وشربت، يسأل سي المواطن العادي كيفاش واحد ولد قلب اريانة والا مالمنزه والا ولد منطقة من قلب العاصمة يرشح روحو لمنطقة في آخر البلاد انقولو ولد اريانة مترشح لسيدي بوزيد براس امكم اش يفهم من مشاكل  سيدي بوزيد ……والامثلة كالبطاطة اش يستنتج سي المواطن العادي بالله موش لحكاية حكاية كراسي.. على بالي الكرسي في البرلمان  ب 1500 د كان موش اكثر ولذا كفايا ...وفرو ازوز فرنك بتاع الدعاية موش انتم باش اتغيرو لبلاد ......اذا3000  شركة اجنبية أو أكثر مستغلة البلاد والعباد ....اذا الديون الخارجية متراكمة الي مصلتينها علينا البنك العالمي والنبك الافريقي وصندوق النقد الدولي وغيرو........اذا صنادق الضمان الاجتماعي  تستنزف.....اذا الصادرات والواردات قاعدة تتراجع ...اذا المقدرة الشرائية ماشية وتتسل مالضعف .....اذا الأجورماشية وتتقزم........اذاالمستوى التعليمي ماشي ووخر.........واذا تونس سئلت بأي ذنب وئدت

..........etc ..

مختصر لحديث "أصبحنا نأكل قمحنا حشيشا" وهالمترشحين يوعدونا  باش ايجيبو الصيد من وذنو.........

الي موش فاهمو سي المواطن المهدود الدخل، الي ماعندو حتى دخل لا بالكراسي الكبيرة ولا الصغيرة،  أعلاه هالجماعة متشمتين فيه بالله آش عمللهم موش اوخيهم يشهق ما يلحق ومن لحيتو ربطولو اشكام، يبقى من المال العمومي اتقيمو الدنيا واتقعدوها بالله كان صبيتوهم هاك الملايين الي تصرفت على الدعاية الانتخابية،  في الصنادق الاجتماعية الي عندها اسنين وهي ماشية واتفرغ موش خير...يا رسول الله حتى الشيخوخة مسيتوهالو....سمعت الي سي المواطن الموظف الي من الفرش للبيرو ومالبيرو للفرش باش اغيرولو اتجاهو كيف يكبر اشوية وولي مالبيرو لصبيطار ومصبيطار للبيرو ومنو للقبر.. امالا اذا باش يزيدو اوخروا في عمر التقاعد. .وزيد كان قعد حي يحل الصندوق مايلقى شي.

أما مالناحية البيئية الدعاية للانتخابات بالكراهب والكيران اللي تلهط من بلاصة لبلاصة زادوا الخنقة النفسية خنقة رئوية بالغاز الكربوني والغلبة انو حزب الخضر معاهم في العجة.

العالم العربي بالذات وبلادنا بالتحديد يلزمهم يتفسخوا ويتعوادو من اجديد....