نوّاحة على الفلاحة

عن قريب، والشر إلبرّى وبعيد، باش انحلو نواحة على الفلاحة إذا مواطنين " بلاد العجائب" وخاصة السلطة الرابعة ولات أصواتـهم مبحاحة وانسوا الّـي كل واحد مسؤول قـدّام ربّي وعبادو على الجيل الجاي الي ما يزيش  امبلع في الديـون لأولاد أولادو انزيدو ما انخلّولُوش باش يستقات.

كيفاش ترى.. !!!!!!!

 باش نبداك يا شحمة لوراك....الموضوع ديليكاتو برشة وطويل وعريض

هات نعطي لمحة عامة....بعض التوانسة (موش الكل على خاطر الأكثرية شعارهم "نني نني جاك النوم راهم ياكلوك كان تقوم) ....قلت عاد بعض التوانسة الي فيبالهم الّـي فمّة نقص كبير في الماء في العالم وبالتالي في التغذية وكيف انقول تغذية انقولو فلاحة وانقولو ارتفاع اسعار المواد الغذائية وبعدها الطبقة الفقيرة تموت بالشر وتجر وراها الطبقة المتوسطة ..وانخلوها واسعة وعريضة لزوز مناس يرتعو في الكاياس.........

أولا..  كان باش يتواصل الزحف العمراني موش باش تبقى حتى شجرة في "بلاد العجايب"

...ياكلو في لجبال باش يبنو أجبالهم ويقتلو أجيالنا.....

 والأدهى وأمر إنو الاراضي الفلاحية الي يقولوا عليهم أقل خصبة  القانون يرخص البني عليها ...أعلاه ما ينقضوهاش ....تو يا رسول الله بلدان زرعوا في الصحراء وبناو فوق الماء ...ونحنا الّي مازال يتنفس شوي يقضو عليه....

السبب الثاني الي باش يخلينا انموتو بالشر.....النزوح...يقول القايل في السبعينات الي يلقوه مخلي  ارضو وجاي للمدينة يرحلوه .....على خاطر كانوا يقدروا قيمة الفلاحة ....تو يحكولهم على المشاريع الكبيرة في العاصمة…… وليسمع يقول للي ما سمعش مواطن الشغل باش تولي متوفرة هاو في البحيرة.... هاو في رواد .....زيد إعدولوهم  في "الهجالة- قناة 7"، كيمة يقول سي خميس، جو العاصمة....ويحبو شباب القرى يشوفو بعينهم ويموتو بقولبهم....وينهم نوابنا  "المتسائلون"...ماو حاولو تشوفو حل باش يكون ثمة توازن في "الجو" بين المناطق والا حتى يشبه لبعضو.... وياريت كان تهزو ولاد العاصمة للمناطق الداخلية خلي يتكبسو شوية ...وما تنساوش المهندس الفلاحي الي يسكن في البحيرة وشادد البيرو..ماو عاونوه باش يعيش جوو في الفلاحة ويعلم الشباب الصنعة...

السبب الثالث ..ملاعب الغولف ....عنا يا سيدي قرابة 10 ملاعب حسب معرفتي كان موش اكثر ... ونوع التوريست الي مستانسين يجو يلعبو ...لكريز المالية خلاتهم يلعبو قدام ديارهم....ولات خسارة هاللعبة اكثر من ربحها ....هذه من الناحية المادية ..من الناحية البيئية ملاعب الغولف تتطلب اللهوة بيه ..اسمدة وموبيدات كميائية تضر المياه الجوفية ...معناه الماء الي تستقات منو الاراضي الفلاحية المجاورة ....آش انقولو على ملاعب الغولف في طبرقة اللي موجودين في منطقة جبلية واللي تضر الاراضي الفلاحية اللي في الاسفل .......

وكان انزيد انقلكم الي ملعب القولف يحتاج إلى 1.3 مليون متر مكعب من المياه سنويا، وهذا ما يكفي لسد حاجة 600 ألف شخص سنويا.........يظهرلي يوفا لحديث ....مصيبة ملاعب القولف لازم تاقف ....موش وقيت باش نكبسو السنتورة والي عينو في الغولف يلعبو قدام دارو .....

السبب الرابع الاستثمار الأجنبي ..هالنقطة وحدها يلزمها نهار ...وسعو بالكم عالانترنات تو تضربكم البهتة....ولى تبعوه ها خويط .

. FAO: les multinationales accusées de chasser les paysans de leurs terres

والمستثمرين موش الكل ناس ملاح ......ولذا إذا رأيت أنياب إبن آوى بارزة فلا تضننّ أن ابن آوى يبتسم.

   وياخوفي ليكون المرحوم بلقاسم الشابي  تنبأ بالحكاية كيف قال

البـــؤس لابن الشعب يأكل قلبــــه والمجــد والإثراء للأغــــراب

والشعب معصــوب الجفون مقسـم كالشاة بين الذئب والقصــاب

وردّو بالكم تبعدو على هالبلوغ... هاني راجعة