أسألك الرحيل

"أسالك الرحيل" هالغناية الرائعة لنجاة الصغيرة ياسر تعجبني هالغناية صالحة لكل مكان وزمان ...اشنية رايكم لوكان تولي النشيد الوطني لبلاد العجايب (تونس)...ويتمعنوا المواطنين فيها ويعرفو وقتاش يسمعوها تو تكون ليهم دوى يقضي على كل امراضهم النفسية...

مثلا مواطن جاه ضيف ثقيل استحملو ساعة ..اثنين..يولي يسمعو هالغناية .."أسألك الرحيل".

ولّى مثلا مواطنة معادش تتفاهم مع  زوجها ..فاش قام العرك والمحاكم ..الحل ساهل برشة...تستدعى سي الرويجل للعشاء البرى ..البرى من غير نفاق ...معناه في وسط الدار.. في السقيفة...في السطح ..يعملو جو رومنسي.. على صحن دلاع قوالب قوالب بو ستة ..تحت ضو ساطع على مجموعة نموس ترقص على نغمات "أسالك الرحيل"..

انزيدكم مثل آخر ...مسؤوول سكروا على خاطرو الطريق في غرغور القايلة  ..وقت مرواح الخدامة .....مواطنين يتقلاو في كراهبهم ويلعنو في النهار الاول الي تعين فيه هالسيد. ..فاش قام هالتوتر..ماو يتفاهمو الكل باش تكون هالغناية موجودة فوقهم ديمة وفي هالموقف يسمعوهالو الكل في نفس الوقت ..غصبا عن عينو يسمعها ....ثماش ما يفهم روحو ونحي هالعادة التعيسة مع العلم أنو أكثر المواطنين ما يعرفوش لاأسماء المسؤوولين في البلاد ولا رهطهم .....

تصوروا لوكان هالغناية تولي النشيد الوطني يتعبشي الفريق الوطني لكرة القدم اذا عندو ماطش البرى ...ملي يسمع نشيد بلادو يولي يلعب على راحتو..

إذا باش تولي هالغناية "أسألك الرحيل"  نشيد وطني معناها باش نولو نسمعوها في برشة مناسبات  وبالتالي من رئيس الدولة وانت ماشي ...كل واحد يحس روحو في لمة غيرمرغوب فيه ماعليه كان يسلها جوينية  ويرتاح ورتح

أسالك الرحيل خطوة أومترا ويا ليت ألف ميلا.... المهم يا سيدي أن نفترقا براس أمك ولو قليلا

هل حبك لنا كبيرا .....ليكون عمره برشة طويلا

                                                                              والسلام علينا