تكلم يا تونس يهديك

ولادك يا تونس عينيك نجومك وقمر لياليك
الحبّ اللي تربّى في عزّك وحرقتو النار اللي فيك
زعمة حْرُمْ عليهم خبزك ولاّ الخبز حرم عليك
ولاّ فمة شكون يلزّك تحرق أكبادك بيديك
تكلّم يا تونس يهديك
***
تكلّم واحكيلي على شبابك الخير اللي معطّل في بابك
العين اللي تتمنّى تشوفك بعيدة على مدافع حجّابك
زعمة اللي معذبهم، خوفك ولاّ الخوف سبب عذابك
ولاّ اللي فهمو ظروفك زادو م الظلم اللي فيك
تكلّم يا تونس يهديك
ولادك يا تونس وبناتك الورد اللي مفتح في ذاتك
العزّ اللي ما يطيق خيانة ولا يرضى بذليل سكاتك
النخوة اللي تخلّي الجبّانة أقرب من خير قصوراتك
الروح اللي كي تشوف إهانة تعفس ع الدنيا وتفديك
تكلّم يا تونس يهديك
تكلّم ما تخلّيش سكوتك يقضي على حريّة صوتك
علاش ترضى يخليو حياتك تصويرة تدل على موتك
علاش هكة الحريّة نساتك رهينة في تركينة قوتك
تبكي في وجه وليداتك وتضحك للي ضحكو عليك
تكلّم يا تونس يهديك