أمي سيسي والأزمة المالية (2

18 Décembre 2011

ما فيها باس كان انسخنو البايت ساعة ساعة

*********

12/11/2010

أمي سيسي اشكون ما يعرفهاش ..واذا ثمة اشكون من أولاد توة ما يعرفهاش يلزمو يبحث في الكتب متاعنا تو يلقى هاكالمرى التونسية الي ملي تحل عينها وهي تجري وتجري باش تنظم الأمور الكل وخاصة اللقمة ويجو بعدها قطاطس الحومة ويطلعوها بلاش عشاء ...
اهاكالمرى الي تكنس تكنس وكيف تلقى لفليس يذوب كالملحة بين ايديها لاتعرفو لاوين وهب ولا وين دب..

توة باش نحكيلكم إحكاية من حكاياتها الي خلاتها تاخو التقاعد من الكنسان..

يبقى قلك يا سيدي نهار مالنهارات إخذات أمنا سيسي لمصلحة (المكنسة) كالعادة إيييييينعم مصلحة إمالا ....ماتقولوليش تكنولوجيا وماتكنولوجيا في بلادنا من شرقها لغربها مازالو يستعملو في مصلحة واتعس مالمصلحة متاع قبل كان لزم ...حصيلو..لمرى طاحت تكنس تكنس التراكن الكل ..وصلت حتى راس النهج وريحة الفليس ولا لقاتو...قالت bon'' الليلة انشوف الأخبار في القنوات التونسية ...موش قالو فمة ازمة مالية عالمية...زعمة ضربتنا وانا مافيباليش''.

في الثمانية حلت التلفزة في قناة 7 ها تو تبدى لخبار.. ها تو تبدى المهم لمرى من نساء بكري أكلي يصبرو على لعوج ...قعدت تستنى..بداتشي لخباربعد موعدها.. ..رمات وذنها قالو لاباس وراكم تعومو وتغطسو في الخير... مافمة شي ..دورت البرابول على satellite الأخرى وقالت بالك على ثنية أخرى تتبدل اللغة... ولقات 7 كيف كيف لاباس مافمة شي ..قامت بهالعملية 7 مرات ولخبار على بلادها هي هي ديمة لاباس ...ولات دورتها انترنات ..مع هي عندها بروكسيproxy يعمل الكيف ودتها بيه حبيبتها مالفايس بوك ...المرى ضربت اسوايع وهي تعوم وتغطس و فمها محلول مالعجب ....وقالت تو فهمت اعلاش لفليس تقطع مالقاعة ...اما اشنية خاسرة انا اذا نعمل تجربة باش انزيد نتأكد مالحكاية.....

..رمات سفساريها على راسها و خذات بياسة بيضة تشبه للدينار غشها بيها حماص الحومة الي هو بيدو غشوه بيها وخرجت ..جات قدام قهوة هو كيف دجي تشوف ما تعبتش باش تلقى قهوة دوب زادت خطوة من عتبة الدار تباركالله في كل خطوة قهوة وما بين كل قهوة فمة قهوة ومليانة بالرجال ...وفي الاوقات الكل ...الحاصل .. وسرسبت الدينار المضروب ..ياسيدي ويهبطو أعليها جماعة وكان جات ورقة راي مشات ريش يحرزلهم يابسة ...هوما هكاكة كل واحد يقول بياستي وتاقف كرهبة من هنا إلغادي انودكم ومانشهيكم يهبط البلار fumé ويظهر واحد إناس الكل تلفتتلو ...قاللهم ..لبياسة ..فيها راس ...قالولو ايه .....يشبهلي ..قالولو ..تقريب ..امالا لبياسة امتاعي هاتوها.....الكل مشاو يدجاراو...الي فك المنديلة من عند القهواجي باش يحط فيها لبياسة والي فك طبق والي نحى سوريتو ......هذا الكل وأمنا سيسي تتفرج...وباهتة ...حقها انسيت القطوس ....ماهو قعد اتبع فيها بالسرقة ....طامع في احويجة كالعادة...كيف القى لحكاية مسيسة لافيها لاكسكسي ولا قديد ...قال برى إنقز في الكرهبة تو ندلل مع الجماعة ...وفي التنقيزة تخطفو كرهبة أخرى تقلعلو باقي بعبوصو......