يلعن ابو الديمقراطية

بلادنا ....هالبلاد المِسِْميّة...الغالية علََيّ...و على كل تونسي وتونسية   ..كانت حكومتها  شكشوكة ...مُغطِيّة....قراصِتْ...عَرّينا عليها كيف كلانا الجوع....ِزدناها سلاطة بايتة ومشوية..وطلعنا حكومة شرعية.. باسم الديمقراطية ....ومن وقتها وباسم الديمقراطية  واللينا كالكورى بين انصار النهضة ومجلس الشورى..والرابطة الثورجية....وكيما قالو ناس بكري ارضينا بالهم الي غلب علينا وقلنا الصبر باهي زيد هالحكومة ماهي الا وقتية

احنا هكاكة صابرين...طل علينا نور العين ...ناصر الحق والدين...سي الجبالي الي وين نراه من غير ما نشعر نول نبكي على حالكم وحالي ..باش يبشرنا ...ويقوللنا اللي هالنهارين ...باش يصير...تحوير  ..

فاتو النهارين ...تعداو الشهرين....واحنا هكاكة قاعدين ...وللتحوير متشوقين  ......يعاود يطل علينا نور العين ...ناصر الحق والدين....باش  ياكد لينا اللي نحنا فعلا.... بالتوالي ماشييين .....اما  التحوير الوزاري ...مازال يطيب سلة سلة ...وماناقص كان تحريكة جماعة المجلس التاسيسي...اللي زادونا علّة على علّة .. باش يعملو عليه طلة...هكاكة طبيخة لحكومة الشرعية تزيد  بِنة على بنة ....

مخ الهدرة

يلعن بو الديمقراطية اللي خلاتنا مشَلْكين في كل بر وفي كل ثنية....

يلعن بو الديمقراطية اللي خلاتنا بالزوز فرنك اللي متسلفينهم نستقبلو الوهابية في قصر الجمهورية

يلعن بو الديمقراطية ..اللي خلات دستور البلاد يخمر للحملات الانتخابية

يلعن بو الديمقراطية اللي خلات الّي الحابل والنابل في امور البلاد الداخلية والخارجية

يلعن بو الديمقراطية اللي خلطت المفعول به بالفاعل والمفعول وخلاّت الازلام والفُسّاد مبنيين للمجهول....

يلعن بو الديمقراطية..........

وحسبنا الله ونعم الوكيل في من يقتل البلاد ويمشي في جنازته