تونس / من "جملكية" المنصف إلى "جُمخِلافية" المرزوقي

انتخب المجلس التأسيسي البارح (12.12.2011) زعيم حزب المؤتمر من أجل الجمهورية" الدكتور المنصف المرزوقي رئيس مؤقت للجمهورية بغالبية 153 صوت مقابل 3 اصوات وامتناع 2 عن التصويت و 44 بطاقة بيضاء من اجمالي 202 عضو من اعضاء المجلس البالغ عددهم 217.

سي المرزوقي الي كان مكشر على أنيابو ايام بن علي خلّى برشة ناس ضاربتهم البهتة هالايامات قبل الانتخابات ومنهم أنا  كيف لزم الصمت وقت اللي تحل لحديث على صلوحيات رئيس الجمهورية والاغرب انو كان زادة سلبي تجاه مواقف المعارضة وعدم  مساندتو حتى  بكلمة للنواب الّي دافعو عليه  بشراسة وحبوه يكون رئيس فعلي لا شرفي أما آش يقول الميت قدام غاسلو ..حزب النهضة أعطى إملآت ...وانشاءالله ما يجيش النهار الي يقولونا فيه نحن "ربكم الأعلى"....

والي يحير الي سي المرزوقي جرى وحدو باش جا الاول ....والغلبة الّي اكبرانو ثلة مالشعب رجعو "فرحين مسرورين" للتهليل والتكبير والبوس والتعنيق ومن حينو دق البندير في بعض القنوات ...وتخمر البعض ...وما تسمع كان ملا شيخة وملا جو هذا يوم تاريخي هذي هي  الديموقراطية ولا بلاش ...

بالله  كيفاش هالديمقراطية  والشعب ما يعرفش هالرئيس وقتاش يكمل مهامو     !!  ؟؟..وين هالديمقراطية ولّي يتبع الانتخابات الرئاسية في الدول المتقدمة يلاحظ الي حتى لآخر دقيقة والشعب ما يعرفش إشكون الرئيس ونحنا ما يزيش نعرفوه بالمسبق كالعادة زيد البلدان الشقيقة والشبيهة تهني في سي المرزوقي قبل الاعلان بالنتيجة !!!!!!!!

الي صار البارح ما عندو حتى دخل بالديمقراطية ...نحنا فقط اخذنا الديمو....أما لقراطية يلزم الشعب يخدم صباح وليل باش يتحصل عليها ولصقها لدّيمو....وقتها انطبلو وانغنو ....اما اليوم الخوف كل الخوف من رجوع السيستام  الي يخدم الدكتاتورية بغلاف جديد ....الخوف انو فمة ناس تخدم في هالسيستام مازالو ما خلصوش" الفاتورة " ومازالو مطفين عليهم الضو ... والخوف انو العالم الكل يبحلق فينا ويحبنا نطلعو بطلعة ما طلع بيها حد لا قبلنا ولا بعدنا وسي المرزوقي الي قال رانا عشنا 50 سنة في جملكية   وليس في جمهورية انشاء الله ما يدخلش في السيستام  ويساهم في تحضير " الجُمخِلافَِيّة.". !!!!!!!. وكيف ما قال المتنبي " على قدر العزم تأتي العزائم" .

سنظل متافئلين لانو في كل صباح لازم نلقو الكلام مازال مباح

واختم بالدعاء لرئيسنا المؤقت واعضاء الحكومة الّي باش يهلو علينا قريبا....قولو آمين مسبقا

اللهم دََمَقترهُم ولا تُدَكترهُم

اللهم ألهمهُم صَحوة الضمير حتى لا نحرم من حرية التعبير

اللهم باعد بينهم وبين المُبَندرين والمُطَبلين حتى لا يُصبحو مُتَفَرعنين

اللهم إغنهم ولا تفقرهم

اللهم شبعهم ولا تجوعهم

اللهم ألهمهم القناعة حتى يَرَو الدينار دولار

والسيارة طيارة

اللهم جنبهم المس بمجلة الاحوال الشخصية وبجميع مكتسبات الديمقراطية

حتى لا يعودوا بنا الى عصر الجاهلية 

آمييييييييييييييييييييييييييييييين

وانشاء الله مدونتي ما تكونش اول مدونة تضربها 404 بعد الثورة

بالمناسبة نستدعاكم باش تقراو آش كتبت ايام الانتخابات جانفي 2010 و قلت فيها

 العالم العربي بالذات وبلادنا بالتحديد يلزمهم يتفسخوا ويتعوادو من جديد

.وخطفت بالجد ...

Lettre ouverte aux politicards